“Onun yoxluğunu qəbul etmək çox çətindir” – beşqat dünya çempionu

“Onun yoxluğunu qəbul etmək çox çətindir” – beşqat dünya çempionu
21-04-2018 / 20:47 STOLÜSTÜ OYUNLAR
113

Vüqar Həşimov Memorialını izləmək üçün Şəmkirə qonaq gələn beşqat dünya, on bir qat olimpiya çempionu Nona Qaprindaşvili ShamkirChess 2018 turnirinin rəsmi saytına müsahibə verib. Apasport.az saytının məlumatına görə, Gürcüstan şahmatının canlı əfsanəsi turnir haqda fikirlərini açıqlayıb.


Məşhur qrossmeyster ilk olaraq superturnir haqqında danışıb: "Şəmkirdə ilk dəfə qonağam. Əslində açılışdan sonra Gürcüstana qayıtmalıydım. Lakin iştirakçıların adını öyrənəndə bir neçə gün Şəmkirdə qalmağa qərar verdim. Çox güclü heyət formalaşıb. Maqnus Karlsen, Şəhriyar Məmmədyarov, Sergey Karyakin və digərlərinin Şəmkirdə yarışması şahmat bayramıdır. Xüsusilə yarışın Vüqar Həşimovun xatirəsinə həsr olunmasını qeyd etmək istəyirəm. Vüqar gənc yaşında bizi tərk etdi. Onun yoxluğunu qəbul etmək çox çətindir. Ona görə belə turnirlərin təşkili çox vacibdir. Artıq 5-ci dəfə keçilir, deməli özünəməxsus tarixə malikdir".

Nona Qaprindaşvili Berlində keçirilən İddiaçılar Turnirini izlədiyini və Azərbaycan şahmatçısı Şəhriyar Məmmədyarovun çıxışını yüksək qiymətləndirdiyini bildirdi: "Şəhriyar son iki ildə çox möhtəşəm oyun sərgiləyir. Berlindəki yarışda qələbə qazanmağa çox yaxın idi. Bir məğlubiyyət onu geri saldı. Bununla belə Şəhriyarın potensialını yüksək qiymətləndirirəm. Bu adam dünya çempionu olmağa qadirdi. Sadəcə ilk olaraq çempionla görüşə vəsiqə qazanmaq lazımdır. Ümumiyyətlə Azərbaycanda şahmat inkişafdadır. Daha çox kişi şahmatçıların uğurlarını izləyirik. Məmmədyarov, Rəcəbov, Məmmədov və digərlərinin Avropada güclülər sırasında olmasını unutmaq olmaq. 2017-ci ildə Azərbaycan komandası üçüncü dəfə Avropa çempionu oldu. Adi komanda qitə çempionu ola bilməz".

Noyabrda Londonda dünya şahmat tacı uğrunda görüş baş tutacaq. Hazırkı çempion Maqnus Karlsen ABŞ təmsilçisi Fabiano Karuanaya qarşı mübarizə aparacaq. Qaprindaşvili bu dueldə Karlseni favorit hesab etdiyini dedi: "Hər iki şahmatçı çox güclüdür. Amma Maqnusu rəqibindən daha üstün sayıram. Bu gənc oğlan ardıcıl neçə il çempion titulunu qoruyur. Deməli qələbə qazanmağa gücü az deyil. Karlsen çox peşəkar idmançıdır. Onun turnirlərdəki çıxışı, hazırlığına heyranam. Sanki o ancaq şahmat haqqında düşünür".

ShamkirChess 2018 superturnirinin təşkilatçılığı barədə danışan gürcü şahmatçı iştirakçıları xüsusi qeyd etdi: "Azərbaycanda güclü şahmat və təşkilatçılıq ənənələri var. Sizin Ümumdünya Şahmat Olimpiadasını necə keçirməyiniz unudulmayıb. Sizin şahmat yarışlarına xüsusi yanaşması var. Superturnir yüksək səviyyədə təşkil olunub. Heyət çox güclüdür. İlk turda zala daxil olanda köhnə illəri yada saldım. İnanın, ShamkirChess 2018 kimi turnirdə iştirak etməyi hər şahmatçı arzulayır. Bu heyəti görəndə şahmat oynadığım vaxtlar yadıma düşdü. Bir anlıq mən də bu iştirakçıların yanında olmaq, belə turnirdə qələbə uğrunda yarışmaq istəyərdim".